اہل بیت نیوز ایجنسی ابنا کی رپورٹ کے مطابق، ماہِ رمضان کی آمد کے ساتھ ہی کینیڈا کے مختلف شہروں میں عرب اور مسلم برادریوں نے غزہ کے متاثرین کی مدد کے لیے وسیع پیمانے پر امدادی سرگرمیاں شروع کر دی ہیں۔ یہ اقدامات ایسے وقت میں سامنے آئے ہیں جب غزہ شدید انسانی بحران، خوراک اور طبی سہولیات کی قلت کا سامنا کر رہا ہے۔
اطلاعات کے مطابق صوبہ البرٹا کے شہر کلگری میں متعدد فلاحی اداروں نے چندہ مہمات اور تقریبات کا انعقاد کیا، جن کا مقصد غذائی پیکجز، افطار کے گرم کھانے، عارضی رہائش اور طبی سہولیات کی فراہمی ہے۔
اس سلسلے میں نمایاں تقریب فلاحی ادارے ہیومن کنسرن انٹرنیشنل کے زیر اہتمام منعقد ہوئی، جس میں عرب و مسلم کمیونٹی کے افراد، کینیڈین سماجی کارکنان اور فلسطینی نژاد خاندانوں نے شرکت کی۔ تقریب کے دوران غزہ میں جاری منصوبوں پر بریفنگ دی گئی اور امداد کی ترسیل کے طریقہ کار سے آگاہ کیا گیا۔ تقریب کے اختتام پر 100 ہزار کینیڈین ڈالر جمع کیے گئے۔
ادارے کے فنڈ ریزنگ ڈائریکٹر سیفین صالحہ کے مطابق رمضان کے دوران یہ رقوم غذائی پیکجز اور مستحق خاندانوں میں افطار کی فراہمی پر خرچ کی جائیں گی۔ ان کا کہنا تھا کہ موجودہ حالات میں خوراک، پینے کے صاف پانی اور طبی امداد سب سے بڑی ضرورت ہیں۔
دوسری جانب البیت الفلسطینی کے زیر اہتمام منعقدہ ایک اور بڑی تقریب میں 3 لاکھ 15 ہزار کینیڈین ڈالر جمع کیے گئے۔ تنظیم کے بورڈ رکن محمود الشاعر کے مطابق یہ فنڈز یتیم بچوں کی کفالت، عارضی خیموں کی فراہمی، اجتماعی افطار اور تقریباً 1 لاکھ 50 ہزار ڈالر کی لاگت سے ایک موبائل کلینک کے قیام پر خرچ ہوں گے۔
منتظمین کا کہنا ہے کہ تمام امدادی رقوم کی ترسیل شفاف طریقہ کار کے تحت کی جائے گی اور یہ سلسلہ پورے رمضان جاری رہے گا۔ ان تقریبات کے موقع پر فلسطینی ثقافت کو اجاگر کرنے کے لیے دستکاریوں اور روایتی مصنوعات کے اسٹالز بھی لگائے گئے، جنہیں حاضرین کی جانب سے بھرپور پذیرائی ملی۔
منتظمین کے مطابق ان مہمات کا مقصد نہ صرف غزہ کے متاثرین کی عملی مدد کرنا ہے بلکہ کینیڈا میں عوامی شعور بیدار کرنا اور انسانی ہمدردی کے جذبے کو فروغ دینا بھی ہے۔
آپ کا تبصرہ